સાવધાન! ઈ-મેમોથી બચવા નંબર પ્લેટ સાથે છેડછાડ કરવા પર થઈ શકે છે 10 વર્ષની જેલ

અમદાવાદીઓને પોલીસની ચેતવણી

અમદાવાદ: ટ્રાફિકના નિયમનો ભંગ કરવા બદલ ઘરે ઈ-મેમો ન આવે તે માટે નંબર પ્લેટ સાથે ચેડા કરી રહેલા અમદાવાદીઓ સામે પોલીસે લાલ આંખ કરી છે. વાહનની નંબર પ્લેટ સાથે કોઈપણ પ્રકારના ચેડા કરનારાને 100 રુપિયાથી લઈને 300 રુપિયાનો દંડ થઈ શકે છે. એટલું જ નહીં, ગુનાની ગંભીરતા અનુસાર તેમાં દસ વર્ષની જેલની સજાની પણ જોગવાઈ છે.

ગાંધીનગરના એક બિલ્ડર સામે થયો કેસ

નંબર પ્લેટ સાથેની છેડછાડની ગંભીર નોંધ લેતા અમદાવાદ ટ્રાફિક પોલીસે ગાંધીનગરના એક બિલ્ડર સામે કેસ દાખલ કર્યો છે. પોલીસનું કહેવું છે કે આવા કોઈપણ પ્રયાસ કરનારાઓને છોડવામાં આવશે નહીં. નંબર પ્લેટને ઢાંકવાનો, તેને વાળી નાખવાનો કે તેના નંબર દેખાય નહીં તે મતલબના કોઈપણ ચેડા કરનારા સામે પોલીસ કડક પગલાં લેશે.

બિલ્ડરે ગાડીનો નંબર બદલી નાખ્યો હતો

ગાંધીનગરના બિલ્ડર ચંદ્રેશ રાવલે ઘરે ઈ-મેમો ન આવે તે માટે પોતાની ગાડીના રજિસ્ટ્રેશન નંબર સાથે કલરથી છેડછાડ કરી હતી. તેની ગાડીનો નંબર 5952 હતો, જેને બદલી તેણે 5962 કરી નાખ્યો હતો. ચંદ્રેશે રેડ સિગ્નલ તોડ્યા હોવાના ચાર ઈ-મેમો જનરેટ થયા હતા, પરંતુ તેણે ગાડીના નંબર સાથે છેડછાડ કરી હોવાથી તે મેમો ગાંધીનગરમાં જ રહેતા સુહાગ પટેલના ઘરે પહોંચ્યા હતા.

ગુનો એકનો, મેમો બીજાના ઘરે જતો

ઈ-મેમોમાં દેખાતી કાર પોતાની ન હોવાને કારણે સુહાગ પટેલ પોલીસ સ્ટેશન પહોંચ્યા હતા. પોલીસે આ મામલે તપાસ કર્યા બાદ જે કાર ઈ-મેમોમાં દેખાતી હતી તે ચંદ્રેશ રાવલની હોવાનું શોધી કાઢ્યું હતું. આ કેસ બનાવટી દસ્તાવેજ ઉભા કરવાનો હોવાથી ગાંધીનગર પોલીસે સુહાગ પટેલને નવરંગપુરા પોલીસ સ્ટેશને ફરિયાદ નોંધાવવા કહ્યું હતું. આખરે નવરંગપુરા ટ્રાફિક પોલીસે આ મામલે ઠગાઈ, બનાવટી દસ્તાવેજો ઉભા કરવાનો ગુનો નોંધ્યો છે.

લોકો નંબર પ્લેટ સાથે આવા ચેડા કરે છે

અમદાવાદ ટ્રાફિક પોલીસના જેસીપી જેઆર મોથલિયાના જણાવ્યા અનુસાર, ઈ-મેમોથી બચવા લોકો નંબર પ્લેટ સાથે છેડછાડ કરી રહ્યા હોવાનું સામાન્ય બની રહ્યું છે. લોકો નંબર પ્લેટ પર કાદવ લગાવી દે છે, તેમાં સ્ક્રેચ પાડી દે છે અને ક્યારેક તો તેને વાળી પણ દે છે. આવું કોઈપણ કૃત્ય કરવું સજાપાત્ર ગુનો છે, અને તેમાં 10 વર્ષ સુધીની જેલ પણ થઈ શકે છે.

from Page Array – I Am Gujarat http://bit.ly/2YG0FcM