અમદાવાદ:અમૂલ બ્રાન્ડની માલિક ગુજરાત સ્ટેટ મિલ્ક માર્કેટિંગ ફેડરેશને (જીસીએમએમએફ) બે વર્ષના ગાળા બાદ દૂધના ભાવમાં લિટરે ₹2નો ભાવ વધારો કર્યો છે. મંગળવારથી આ ભાવવધારો અમૂલ તાજા, ગોલ્ડ, શક્તિ અને ટી-સ્પેશિયલને લાગુ પડશે. સામાન્ય જનતાને ભાવવધારાની સીધી અસર પડશે પણ ખેડૂતો અને પશુપાલકોને આ નિર્ણયથી ફાયદો પણ થશે કારણ કે ફેટના આધારે દૂધ પર તેમને વધુ વળતર ચૂકવાશે. અમૂલે દૂધની ખરીદીના ભાવમાં પણ વધારો કર્યો છે. ભેંસના દૂધમાં પ્રતિ કિલો ફેટે ₹10 અને ગાયના દૂધમાં પ્રતિ કિલો ફેટે ₹4.60નો વધારો કરવામાં આવ્યો છે.
જીસીએમએમએફના મેનેજિંગ ડિરેક્ટર આર એસ સોઢીએ જણાવ્યું હતું કે, “નવો ભાવ મંગળવારથી અમલી થઈ જશે.” તેમણે કહ્યું કે, કો-ઓપરેટિવ ડેરી તેમને ગ્રાહકો પાસેથી મળતા પ્રત્યેક રૂપિયામાંથી 80 પૈસા ખેડૂતોને, દૂધ ઉત્પાદકોને ફાળવે છે.
છેલ્લા એક વર્ષમાં કેટલફીડ અને ઘાસચારાના ભાવમાં વધારો થયો છે. અમે ખેડૂતોને બેથી ત્રણ રૂપિયાનો વધારો કરી આપ્યો છે જેને આગામી દિવસોમાં પણ વધારવામાં આવશે. ખેડૂતો માટે 2017-’18માં પ્રતિ કિલો ફેટનો ભાવ ₹710 હતો જે વધારીને 2018-’19માં ₹730 પ્રતિ કિલો કર્યો છે. છેલ્લા કેટલાક મહિનાઓથી વિવિધ સહકારી ડેરી જે દૂધ મેળવે છે તેમાં દૂધની ખરીદકિંમતમાં 5થી આઠ ટકા એટલે કે ₹30થી ₹50નો વધારો થયો છે. જે ખેડૂતોને વધુ ને વધુ દૂધાળા પશુ ખરીદવા અને વધુ દૂધ એકત્ર કરવા પ્રેરે છે.
સોઢીએ જણાવ્યું હતું કે, “ડી-ઓઇલ રાઇસ બ્રાનનો ભાવ 61 ટકા વધ્યો છે. સાથે સાથે પોલિશ્ડ રાઇસ 22 ટકા, મોલાસિસ 92 ટકા, મેઇઝનો ભાવ 63 ટકા વધ્યો છે. તે જ રીતે ઘાસચારાના ભાવમાં 100 ટકાનો વધારો થયો છે.” આ વર્ષે ઉનાળામાં દૂધની આવક ઘટી જતા ભાવમાં વધારો કરવામાં આવ્યો છે.
from Page Array – I Am Gujarat http://bit.ly/2YMaYMz
No comments:
Post a Comment