શિલ્પા શેટ્ટીની જેમ બધું ઓર્ગેનિક ખાવાનો શોખ હોય તો ઘરે જ ઉગાડો કારેલા, આ છે સૌથી સરળ રીત

હોમ ગાર્ડનમાં કારેલાઃ

આજકાલ ઓર્ગેનિક શાકભાજીનો ખાસ્સો ટ્રેન્ડ ચાલ્યો છે. બોલિવુડ એક્ટ્રેસ શિલ્પા શેટ્ટીએ તેના ફિટનેસની સિક્રેટ શેર કરતા કહ્યું હતું કે તે ઘરે ઉગાડેલું જ બધું ખાય છે. બજારમાંથી ઓર્ગેનિક શાક લેવા જઈએ તો ખાસ્સુ મોંઘુ પડે છે. આવામાં જો તમને ગાર્ડનિંગનો શોખ હોય તો તમને નાનકડા કૂંડામાં પણ શાકભાજી ઉગાડી શકો છો. આવું જ એક શાક છે કારેલા. સ્વાદમાં કડવા કારેલા સ્વાસ્થ્ય માટે ગુણકારી છે. વળી ઘરે ઉગાડેલા કારેલા ખાવાની મજા જ ઓર છે. તો જાણો ઘરે કારેલા ઉગાડવાની સૌથી સરળ રીત.

હવે એક મેસેજ મોકલી WhatsApp પર મેળવો અમારા ન્યુઝ, Start કરવા અહીં ક્લિક કરો

સ્ટેપ 1

કારેલા વેલા પર થાય છે. કારેલાની વેલ ઉગાડવા માટે મોટુ કૂંડુ લો. તેમાં 60 ટકા જેટલી સામાન્ય માટી અને 40 ટકા જેટલું ખાતર લઈને કૂંડુ તૈયાર કરો.

સ્ટેપ 2

કૂંડામાં હાથ વડે ચાર કાણા પાડીને તેમાં પાકી ગયેલા કારેલાના બીજ રોપો. જો બીજ સૂકાઈ ગયા હોય તો તેને થોડી વાર પાણીમાં પલાળી રાખો અને પછી રોપો. ત્યાર પછી ચારેય ખાડાને પાણીથી કવર કરી લો.

સ્ટેપ 3

કારેલા ઉગાડવાનો સૌથી સારો સમય માર્ચથી મે મહિનાનો છે. આ ગાળામાં તેની વેલ જલ્દી વિકસે છે. એક વાર વેલ ઊગી જાય પછી બારેમાસ તે કારેલા આપતી રહે છે. તેના છોડને સારા એવા પાણીની જરૂર પડે છે. આથી બીજ વાવ્યા પછી માટી સૂકાય નહિ એ વાતની તકેદારી રાખો. કારેલાના છોડને લગભગ 24થી 38 ડીગ્રી તાપમાન વચ્ચે રાખવો જોઈએ.

સ્ટેપ 4

છ દિવસ પછી તમે જોશો તો બીમાંથી નાનો છોડ ઊગીને નીકળશે. ધીરે ધીરે મહિના થતા આ વેલ મોટી થતી જશે. વેલને દોરીનો સપોર્ટ આપીને ઉપર ચડાવતા રહો.

સ્ટેપ 5

વેલ પર કારેલા થવા માટે પતંગિયા કે મધમાખીઓનું હોવું જરૂરી છે. તે પુંસવનની ક્રિયાને પ્રોત્સાહન આપે છે. આથી કારેલાની આસપાસ વધુ ફૂલના છોડ રાખી પતંગિયા કે મધમાખીને આકર્ષો. દર ત્રીસ દિવસે કૂંડામાં થોડુ ખાતર ઉમેરતા રહો, નીંદણ દૂર કરો.

સ્ટેપ 6

75 દિવસ સુધી નિયમિત પાણી નાંખ્યા બાદ તમે જોશો કે વેલ પર ધીમે ધીમે કારેલા મોટા થઈ રહ્યા છે. કારેલા થોડી મોટી સાઈઝના થાય ત્યાર પછી કાતરથી તેને છોડથી દૂર કરો અને ઉપયોગમાં લો.

(સૌજન્યઃ અર્બન ગાર્ડનિંગ)

from Page Array – I Am Gujarat http://bit.ly/2JFVGo4