ચૂંટણીના વર્ષમાં માર્કેટમાં ઊંચા વળતરનો ટ્રેન્ડ

ભાર્ગવ ત્રિવેદી

અમદાવાદ: ભારતીય શેરમાર્કેટને ચૂંટણીના વર્ષ સાથે વિશેષ સંબંધ હોય એવું લાગે છે. સામાન્ય રીતે ચૂંટણીની સીઝન રોકાણકારો માટે તણાવભરી હોય છે. કેમ કે માર્કેટમાં હંમેશા પરિણામો અગાઉ અટકળો આધારિત ઊંચી વોલેટિલિટી જોવા મળતી હોય છે.

ચાલુ ચૂંટણી સીઝનમાં પણ હાલમાં બજાર આ સ્થિતિમાંથી પસાર થઈ રહ્યું છે. જોકે અગાઉના ચૂંટણી વર્ષોમાં બજારના દેખાવ પર નજર નાખીએ તો એક વાત સ્પષ્ટ થાય છે કે ચૂંટણીના વર્ષ દરમિયાન માર્કેટ હંમેશા નોંધપાત્ર સુધારો દર્શાવતું હોય છે.

છેલ્લી પાંચ લોકસભા ચૂંટણીઓ દરમિયાન સંબંધિત કેલેન્ડર વર્ષમાં બજારે મહત્તમ 189 ટકા સુધીનું ઊંચું વળતર નોંધાવ્યું છે. અલબત્ત અન્ય પરિબળોએ પણ આ માટે પોતાનું યોગદાન આપ્યું જ હશે પરંતુ અભ્યાસ સૂચવે છે કે ચૂંટણીનું વર્ષ બજાર માટે પોઝિટિવ હોય છે એવું કહી શકાય. કેલેન્ડર 2019માં પણ અત્યાર સુધી બેન્ચમાર્ક 4-5 ટકાનું રિટર્ન સૂચવી રહ્યા છે.

છેલ્લાં પાંચ ચૂંટણી વર્ષો દરમિયાન સેન્સેક્સે દરેક દરમિયાન પોઝિટિવ રિટર્ન નોંધાવ્યાં હતાં. આમ પણ બેન્ચમાર્ક છેલ્લાં 30 વર્ષો દરમિયાન સરેરાશ 15 ટકાથી વધુના દરે સુધારો

દર્શાવી રહ્યો છે. જોકે ચૂંટણીનાં વર્ષોમાં તેણે સરેરાશ વળતર કરતાં નોંધપાત્ર ઊંચો લાભ દર્શાવ્યો છે. વર્તમાન અભ્યાસમાં રિટર્નની ગણતરી સંબંધિત કેલેન્ડરના ટોચ અને તળિયા વચ્ચના તફાવતને આધારે કરવામાં આવી છે.

આ રીતે જોઈએ તો કેલેન્ડર 2009 દરમિયાન બેન્ચમાર્ક 189 ટકા જેટલો ઊછળ્યો હતો. આ આંકડો કેલેન્ડર દરમિયાન 8,047ના તળિયા અને 17,530ની ટોચને ધ્યાનમાં રાખીને ગણના કરવામાં આવ્યો છે. એ વાત નોંધવી રહી કે કેલેન્ડર 2008 દરમિયાન વૈશ્વિક બજારોમાં ભારે વેચવાલીને પગલે સ્થાનિક બજારમાં પણ મોટો ઘટાડો જોવા મળ્યો હતો અને તેની પ્રતિક્રિયાને રૂપે 2009માં સુધારો ઊંચો હતો.

ઉપરાંત કેલેન્ડર 2009ની ચૂંટણીમાં મનમોહન સિંઘના નેતૃત્વની યુપીએ સરકારે ડાબેરીઓના સમર્થન વિના ચૂંટણીમાં વિજય મેળવ્યો હતો અને તેથી બજારે તેને ભારે ઉત્સાહથી વધાવ્યો હતો. આ સિવાય ચૂંટણીનાં અન્ય વર્ષોમાં કેલેન્ડર 1996 (62 ટકા), 1999 (62 ટકા), 2004 (32 ટકા) અને 2014 (57 ટકા)નું રિટર્ન જોવા મળ્યું હતું.

એ વાત ઉલ્લેખનીય છે કે કેલેન્ડર 2004માં વાજપેયીના નેતૃત્વની એનડીએ સરકાર હારતાં બજારે આરંભિક પ્રતિક્રિયામાં મોટો ઘટાડો દર્શાવ્યો હતો. જોકે તેમ છતાં સમગ્ર કેલેન્ડરમાં તેણે 32 ટકાનો સુધારો દર્શાવ્યો હતો. આ જ રીતે 1996માં પણ ચૂંટણી બાદ પ્રથમવાર દેશમાં ગઠબંધન સરકાર અસ્તિત્વમાં આવી હતી અને તેમ છતાં સેન્સેક્સમાં 62 ટકાનું ઊંચું રિટર્ન જોવા મળ્યું હતું. કેલેન્ડર 2014માં નરેન્દ્ર મોદીના નેતૃત્વમાં એનડીએની સરકારની રચના બાદ બજારમાં સુધારો જળવાયો હતો અને નોંધપાત્ર રિટર્ન જોવા મળ્યું હતું.

from Page Array – I Am Gujarat http://bit.ly/2YymLh6