ખૂંખાર નક્સલીઓ વચ્ચે ફરજ બજાવતી આ મહિલા કમાન્ડોને જોઈ સલામ કર્યા વગર નહીં રહી શકો

પહેલા હતી નક્સલી હવે એ જ લાલ આતંક વિરોધી કમાન્ડો

રશ્મી દ્રોલિયા, રાયપુરઃ કેટલાક વર્ષો પહેલા સુધી તે જંગલોમાં નક્સલીઓ સાથે ફરીને ભારતીય સરકાર અને પોલીસ તેમજ જવાનો વિરુદ્ધ લડતી હતી. પરંતુ આજે સાચી દિશા મળ્યા બાદ આત્મસમર્પણ કરી ચૂકેલી અને નક્સલવાદીઓથી પીડિત આ મહિલાઓ મોટાભાગે તો ઘરના કામકાજમાં પોતાને વ્યસ્ત રાખે છે. પરંતુ તેમાંથી કેટલીક હાથમાં AK-47 સાથે નક્સલવાદીઓ વિરુદ્ધની જંગમાં સૌથી આગળના મોરચે રહે છે.

હવે એક મેસેજ મોકલી Whatsapp પર મેળવો ન્યૂઝ, શરુ કરવા માટે અહીં ક્લિક કરો

દંતેશ્વરી લડાકે નામથી ઓળખાય છે આ કમાન્ડોઝ

છત્તિસગઢના જંગલોમાં ફરતી આ મહિલા કમાન્ડોની ટુકડીને દંતેશ્વરી લડાકે નામ આપવામાં આવ્યું છે જે અહીંની સ્થાનિક દૈવી દંતેશ્વરીના નામ પરથી છે. આ કમાન્ડોએ બુધવારે નક્સલીઓ વિરુદ્ધ એક ઓપરેશન કર્યુ હતું જેમાં બે નક્સલી માર્યા ગયા. પોલીસના સૂત્રોએ કહ્યું કે આ મહિલા કમાન્ડોએ સમગ્ર ઓપરેશન દરમિયાન પુરુષ કમાન્ડોની સાથે ખંભેખંભા મેળવીને ઓપરેશનને અંજામ આપી રહી છે. આ મહિલા કમાન્ડો એક જ મહિનામાં 5 નક્સલીઓને ઠાર કરી ચૂકી છે.

દિવસો સુધી જંગલમાં રહીને યુદ્ધ કરવામાં માહેર છે

આત્મસમર્પણ કરી ચૂકેલી મહિલા નક્સલીઓને કમાન્ડો બનાવવાનો પ્રયોગ દંતેવાડાના એસ.પી. અભિષેક પલ્લવના મગજની ઉપજ છે. ચાર મહિના પહેલા તેઓ જ્યારે આત્મસમર્પણ કરેલા નક્સલીઓના કેમ્પની મુલાકાતે ગયા હતા ત્યારે તેમને આ વિચાર સ્ફૂર્યો હતો. તેમણે કહ્યું કે, એક તરફ જ્યાં પુરુષ પૂર્વ નક્સલીઓને ટ્રેનિંગ આપીને ડિસ્ટ્રિક્ટ રિઝર્વ ગાર્ડમાં ભરતી કરવામાં આવે છે ત્યાં મહિલાઓ ફક્ત ઘરમાં બેસીને ઘરકામ કરવાનો વારો આવતો હતો. જેના કારણે તેમની ક્ષમતા અને સમ્માનને હાની પહોંચતી હોય તેવું લાગતું હતું. ત્યારે તેમણે ડિસ્ટ્રિક્ટ એસ.પી. દિનેશ્વરી નંદાને મહિલા કમાન્ડોઝની એક કોમ્બેટ ફોર્સ બનાવવાનું કહ્યું.

ખાસ ટ્રેનિંગ આપવામાં આવી

જે માટે 30 મહિલાઓને પસંદ કરવામાં આવી અને તેમને નિવૃત બ્રિગેડિયર બી.કે. પોંવાર દ્વારા સંચાલિત કાંકેર જંગલ વોરફેર કોલેજ મોકલવામાં આવી. જ્યાં આ મહિલાઓને ડિસેમ્બરમાં ખૂબ જ આકરી યુદ્ધ ટ્રેનિંગ આપવામાં આવી અને જે બાદ માર્ચ મહિના સુધી ઇન હાઉસ ટ્રેનિંગ આપવામાં આવી. જે બાદ ઓન ફિલ્ડ ટ્રનિંગ માટે તેમને નાના-નાના ઓપરેશન્સ પર મોકલવામાં આવતી હતી. હવે આ કમાન્ડોઝ મોટા ઓપરેશન પાર પાડવા પણ તૈયાર થઈ ગઈ છે.

પુરુષો સાથે ખંભેખંભા મેળવીને લડે છે

આ પહેલથી આત્મસમર્પણ કરતી મહિલા પૂર્વ નક્સલીઓને એક નવી દિશા અને આત્મ ગૌરવ સાચવવાનો મોકો મળ્યો છે. એક નક્સલી કપલે તો આત્મસમર્પણ પછી પણ એક જ સાથે કમાન્ડો બનીને લાલ આતંક સામે લડવાની ઇચ્છા જાહેર કરી. આજે દાંતેશ્વરી કમાન્ડોઝ મહિલા અને પુરુષ કમાન્ડોની એક સંયુક્ત ટુકડી છે જે જંગલમાં દિવસો સુધી રહીને યુદ્ધ લડવામાં માહેર છે.

મહિલા કમાન્ડો હોવાનો ફાયદા પણ અનેક

દંતેવાડાના SP પલ્લવનું કહેવું છે કે આનાથી વધુ મહિલા નક્સલીઓને સરેન્ડર કરવાની પ્રેરણા મળશે. હાલ સરેન્ડર કરી ચૂકેલા પુરુષ અને મહિલા નક્સલીઓનો ટકાવારી 90:10 છે. પલ્લવે કહ્યું કે મહિલા કમાન્ડોઝ એટલા માટે પણ પરફેક્ટ છે કે તેઓ પોતાના હથિયાર પોતાની સાડીમાં છુપાવી શકે છે. અને કોઈને કશો શક ન થાય તે રીતે નક્સલવાદીઓની મુવમેન્ટ પર ધ્યાન રાખી શકે છે. તો લોક વચ્ચે જાહેર રસ્તા પર પણ તે ખૂબ સહેલાઈથી ભળી જઈ શકે છે.

વધારે મહિલાઓ ફોર્સ જોઇન્ટ કરે માટે પ્રોત્સાહિત કરવામાં આવે છે

ડિસ્ટ્રિક્ટ રિઝર્વ ગાર્ડ્સ સ્થાનિક આદિવાસી યુવાનો દ્વારા બનાવવામાં આવેલ ફોર્સ છે. જેમાં આત્મસમર્પણ કરી ચૂકેલા નક્સલવાદીઓ પણ સામેલ છે. આ બધાએ લાલ આતંકની સામેની લડાઈમાં ખૂબ જ શાનદાર પ્રદર્શન કર્યું છે. દંતેવાડામાં ડિસ્ટ્રિક્ટ રિઝર્વ ગાર્ડ્સના પાંચ યુનિટ છે અને પહેલીવાર બસ્તર ક્ષેત્રમાં મહિલા કમાન્ડોઝ પણ સામેલ કરવામાં આવ્યા છે. હવે તેઓ યુનિફોર્મ સાથે અલગ વિચારધારા સાથે લડી રહી છે.

from Page Array – I Am Gujarat http://bit.ly/2H9ZkVr