કલ્યાણ પરબત
કોલકાતા: જાન્યુઆરી-માર્ચ ક્વાર્ટરમાં એવરેજ રેવન્યુ પર યુઝર (ARPU)ના માપદંડમાં ભારતી એરટેલે તેની હરીફ રિલાયન્સ જિયો વચ્ચેનો ગેપ ઘટાડવામાં સફળતા મેળવી હતી પરંતુ મોબાઇલ સર્વિસ રેવન્યુના મોરચે તે પાછળ રહી ગઈ હતી. ઉપરાંત, એરટેલ તેના ગ્રાહકોની સંખ્યામાં પણ જિયોની જેમ વધારો કરી શકી નહોતી એમ એનાલિસ્ટ્સ જણાવે છે.
સુનિલ મિત્તલની કંપની ભારતી એરટેલે મુકેશ અંબાણીની રિલાયન્સ જિયોને અસરકારક સ્પર્ધા પૂરી પાડવા માટે ગ્રાહકોની સંખ્યા વધારવા માટે ફરીવાર આક્રમક રીતે ધ્યાન કેન્દ્રિત કરવાની જરૂર છે. જો તે ગ્રાહકોની સંખ્યામાં વૃદ્ધિ નોંધાવવામાં અસફળ રહેશે તો બંને કંપની વચ્ચે મોબાઇલ રેવન્યુનો જે ગેપ છે તે વધશે કારણ કે, એરટેલની ઉત્તરોત્તર ARPUમાં આગામી મહિનાઓમાં ઘટાડો થવાની શક્યતા છે.
એરટેલ અને જિયો વચ્ચે મોબાઇલ રેવન્યુનો ગેપ ડિસેમ્બર ’18 ક્વાર્ટરમાં ₹194 કરોડ હતો, જે માર્ચ ’19 ક્વાર્ટરમાં વધીને ₹474 કરોડ થઈ ગયો હતો, આમ, જિયોની તાકાત વધી રહી હોવાનું સ્પષ્ટ થઈ ગયું છે. એનાલિસ્ટ્સને અંદાજ છે કે, ડિસે ’18 ક્વાર્ટરમાં એરટેલના ગ્રાહકોની સંખ્યા 28.4 કરોડ હતી, જે માર્ચ ’19 ક્વાર્ટરમાં ખાસ વધી નહોતી જ્યારે જિયોએ માર્ચ ’19 ક્વાર્ટરમાં લગભગ 2.7 કરોડ ગ્રાહકોનો ઉમેરો કર્યો હતો.
“માર્ચ ’19 ક્વાર્ટરમાં એરટેલે ભારતમાં વાયરલેસ રેવન્યુમાં 4.3 ટકા વૃદ્ધિ કરીને ₹10,632 કરોડની આવક મેળવી હતી. એરટેલે ભારતના બિઝનેસમાંથી થતી ARPUમાં તીવ્રપણે સુધારો કર્યો હોવાથી તે જિયોના 7 ટકા રેવન્યુ ગ્રોથ સામે કાચી પુરવાર થઈ હતી. આમ, સ્પષ્ટ થઈ જાય છે કે, એરટેલે ગ્રાહકોની સંખ્યામાં વધારો કરવા માટે તાત્કાલિક આક્રમક યોજના ફરી અમલી કરવાની જરૂર છે.” એમ SBI કેપ સિક્યોરિટીઝના રિસર્ચ વિભાગના કો-હેડ રાજીવ શર્માએ ઇકોનોમિક ટાઇમ્સને કહ્યું હતું.
આ બ્રોકરેજને અંદાજ છે કે, એરટેલની માસિક ARPU 21 ટકા વધીને ₹125થઈ હતી જ્યારે જિયોની ARPU ₹126.2 નોંધાઈ હતી, એટલે બંને વચ્ચેનો તફાવત ઘટ્યો હતો. જિયોની ARPU માર્ચ ’19 ક્વાર્ટરમાં 3 ટકા ઘટી હતી. પરંતુ શર્માએ કહ્યું હતું કે, ARPUમાં સુધારો તથા ગ્રાહકોની સંખ્યામાં વૃદ્ધિને કારણે વાયરલેસ રેવન્યુમાં મોમેન્ટમ રહે છે પરંતુ એરટેલ ગ્રાહકોની સંખ્યા વધારી શકી નહોતી જ્યારે ARPUમાં વધારો કરી શકી હતી, આથી તેની રેવન્યુ વધી નહોતી.
from Page Array – I Am Gujarat http://bit.ly/2Vr3rVS
No comments:
Post a Comment