રાજકોટઃ સગી જનેતા બની દીકરીની દુશ્મન, માતાની સામે જ પ્રેમી દીકરી પર દુષ્કર્મ આચરતો

રાજકોટઃ કહેવાય છે મા જેટલો પ્રેમ પોતાના બાળકને દુનિયામાં કોઈ નથી કરી શકતું. બાળકના જન્મથી લઈને તેના ઉછેર સુધીમાં મા જેટલો ફાળો કોઈનો નથી હતો. પોતાના સંતાન પર કોઈ વિપત્તિ આવે ત્યારે પોતાનો જીવ જોખમમાં નાખીને પણ તે બાળકને બચાવે છે. એટલે જ કદાચ તેને ભગવાનનું રૂપ કહેવાય છે. પરંતુ રાજકોટમાં એક વિચિત્ર કિસ્સામાં સગી મા જ પોતાની દીકરીની દુશ્મન નીકળી. પૈસા માટે આ મહિલાએ પોતાની 14 વર્ષની દીકરીને પ્રેમીને સોંપી દીધી, જેણે પાછલા પાંચ વર્ષમાં અનેક વખત તેના પર દુષ્કર્મ આચર્યું.

હવે એક મેસેજ મોકલી Whatsapp પર મેળવો ન્યૂઝ, શરુ કરવા માટે અહીં ક્લિક કરો

મહિલા અને તેનો પ્રેમી વિપુલ પરસાણા બંનેની શનિવારે IPCની કલમ 373 (ગેરકાયદે સગીરને ખરીદી દુષ્કર્મ આચરવું), 376 (બળાત્કાર), 506 (ધમકી આપવી), 323 (ઈજા પહોંચાડવી) અને POCSO એક્ટના સેક્શન 4,6,8,9 અને 17 હેઠળ ફરિયાદ નોંધી ધરપકડ કરી છે. સગીરાના પિતાએ રાજકોટ B ડિવિઝનમાં નોંધાવેલી ફરિયાદ મુજબ તેમના ઘરમાં ભાડુઆત તરીકે રહેતા પત્નીના પ્રેમીએ પાછલા પાંચ વર્ષમાં દીકરી સાથે અનેકવાર દુષ્કર્મ આચર્યું છે. સગીરાએ વધુમાં જણાવ્યું કે આરોપી તેની સાથે દુષ્કર્મ કરવા માટે તેની મમ્મીને પૈસા પણ આપતો હતો.

પોલીસે કહ્યું કે પાંચ વર્ષ પહેલા પીડિતાએ પોતાની માતા અને પ્રેમીને કઢંગી હાલતમાં ઝડપી લીધા હતા. બંનેએ તેને આ વાત કોઈને ન કહેવા ધમકી આપી હતી, અને આમ ન કરવા પર પિતા અને ભાઈનું ખૂન કરવા ધમકાવી હતી. આ બાદ એક રાત્રે પીડિતાની માતાએ તેને પ્રેમી સાથે સૂવા માટે કહ્યું. પીડિતાએ ના પાડી તો માતાએ તેને રૂમમાં ધક્કો મારી દરવાજો બહારથી બંધ કરી દીધો. પીડિતા મદદ માટે બૂમો પાડતી રહી પરંતુ માતાનો પ્રેમીએ કપડા વડે તેનું મોઢું ઢાંકી તેની સાથે દુષ્કર્મ આચરતો રહ્યો.

રાજકોટ બી ડિવિઝનના ઈન્સ્પેક્ટર વી.જે ફર્નાન્ડિઝે કહ્યું, પીડિતાનો આરોપ છે કે વિપુલ તેની માતાની સામે જ તેની સાથે રેપ કરતો અને ઈનકાર કરવા પર પોતે તેની માતાને પૈસા આપ્યા હોવાનું કહેતો. છોકરીનો આરોપ છે કે આરોપી તેની માતા, તેને અને ભાઈને સોમનાથ અને માઉન્ટ આબુ લઈ ગયો હતો, ત્યાં પણ તેની સાથે દુષ્કર્મ આચર્યું હતું.

23 જૂને જ્યારે પીડિતા પોતાની બહેનપણીના ઘરે અભ્યાસ માટે જઈ રહી હતી. તેની માતાએ તેને હંમેશા માટે ઘર છોડીને જતા રહેવા અને મરી જવા માટે કહ્યું. તેની બહેનપણીના ઘરે ક્લાસ શિક્ષકે ફોન કર્યો તો તેણે સમગ્ર હકીકત તેમને જણાવી. તેની શિક્ષકે પરિવારના વિશ્વાસુ વ્યક્તિને સમગ્ર ઘટના જણાવવા કહ્યું. પીડિતાએ પોતાના પિતાને ફોન કર્યો અને આખી વાત કહી. જે બાદ તેના પિતાએ માતા અને પ્રેમી વિરુદ્ધ પોલીસ ફરિયાદ નોંધાવી હતી.

તપાસ દરમિયાન સામે આવ્યું કે વિપુલ પરસાના પરિણીત છે અને પીડિતાના ઘરમાં તે ભાડૂઆત તરીકે રહેતો હતો. પીડિતાના પિતા પોતાની નોકરીને લઈને ઘણીવાર શહેરથી બહાર જતા. આ દરમિયાન પીડિતાની માતા અને ભાડૂઆત વચ્ચે પ્રેમ પાંગર્યો હતો.

from Page Array – I Am Gujarat https://ift.tt/2XI5y84