પાછોતરા વરસાદથી મીઠાનું ઉત્પાદન ઘટ્યું, બગાડી શકે છે તમારા વ્યંજનનો સ્વાદ

કલ્પેશ ડામોર, અમદાવાદઃ ગુજરાત પર આ વખતે મેઘરાજા વધુ પડતા જ મહેરબાન થઈ ગયા. નદી-નાળા અને ડેમ તો છલકાયા પણ પાછોતરા ખેંચાયેલા વરસાદના કારણે ખેતીની સાથે સાથે મીઠાના ઉત્પાદન પર પણ ખૂબ મોટી અસર પડી છે. દુનિયાભરમાં મીઠાના ઉત્પાદનમાં ગુજરાત મહત્વનો ભાગ ભજવે છે. પરંતુ એક બાદ એક આવેલા વાવાઝોડાએ રાજ્યમાં વરસાદની સીઝનને તેના નિયમત સમય કરતા 1-2 મહિના વધુ સમય સુધી ખેંચી જેના કારણે મીઠાના ઉત્પાદનની સીઝન લગભગ 3 મહિના પાછળ ધકેલાઈ ગઈ છે.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો:

દેશમાં સૌથી વધુ મીઠાનું ઉત્પાદન ગુજરાત કરે છે. પરંત આ વખતે લાંબા ચોમાસાના કારણે આ ઉત્પાદનમાં 30-35 ટકાનો ઘટાનો જોવા મળશે. ઈન્ડિયન સોલ્ટ મેન્યુફેક્ચર્સ એસોસિએશન(ISMA) ના અંદાજ મુજબ ભારતમાં વર્ષ 2019-20 દરમિયાન મીઠાનું ઉત્પાદન ગત નાણાકીય વર્ષના 233 લાખ ટન ઉત્પાદનની તુલનાએ ઘટીને 150-160 જેટલું થઈ જશે. વર્ષ 2018-19 દરમિયાન ભારતમાં ઉત્પાદીત થયેલ કુલ 289 લાખ ટન મીઠાની સામે 81% મીઠું એકલા ગુજરાતમાં ઉત્પાદીત થયું હતું.

ISMAના પ્રેસિડેન્ટ બી.સી. રાવલે કહ્યું કે, ‘રાજ્યમાં મીઠા ઉત્પાદનની સરેરાશ સીઝન સપ્ટેમ્બરથી જૂન 10 મહિના સુધી રહે છે. જે હાલ સાડા ત્રણ મહિના જેટલી મોડી શરુ થઈ રહી છે. તેમજ મીઠાનું ઉત્પાદનન કરતા અગરીયાઓને હજુ બીજા દોઢ મહિનો પ્રાથમિક તૈયારીઓ કરતા જશે. જેનો સ્પષ્ટ અર્થ છે કે અમને આ વર્ષે મીઠાના ઉત્પાદન માટે માત્ર 5 મહિના મળશે.’

તેમણે વધુમાં કહ્યું કે મીઠાનો નવો પાક ડિસેમ્બર સુધીમાં આવશે. ગુજરાતમાં મોટાપાયે મીઠાનું ઉત્પાદન કરતા કચ્છ, જામનગર, ભાવનગર, અમરેલી, દક્ષિણ ગુજરાતના કેટલાક વિસ્તાર, માળિયા અને મોરબીમાં વાવાઝોડાના કારણે દરિયાઈ પટ્ટી પર વરસાદથી સૌથી વધુ અસર જોવા મળી રહી છે.

મહત્વનું છે કે કચ્છના નાના રણમાં મીઠાની ખેતી કરતા અગરિયાઓ દર વર્ષે સીઝન આવતા પોતાના ગામડાથી કચ્છના નાના રણમાં જાય છે જોકે આ વખતે વરસાદી સીઝન વધુ ચાલતા અને વાવાઝોડાના કારણે કચ્છના નાના રણમાં પૂર જેવી સ્થિતિ હોવાથી તેમને પોતાના ઘરે પરત ફરવું પડ્યું હતું. જેથી કચ્છના નાના રણમાં મીઠાની ખેતી જાન્યુઆરી 2020 પહેલા શરુ થાય તેવી સ્થિતિ દેખાઈ રહી નથી.

ઇન્ડસ્ટ્રી નિષ્ણાંતોનું માનીએ તો મીઠાના ઓછા ઉત્પાદનથી ફક્ત મીઠું ઉત્પાદન કરતા પરિવારો જ નહીં પરંતુ ભારતમાંથી મીઠાની નિકાસ સાથે જોડાયેલા વેપાર-ઉદ્યોગને પણ મોટી અસર થશે. તેટલું જ નહીં દેશમાં દર વર્ષે 90 લાખ ટન જેટલું મીઠું ભારતીયો રસોઈથી લઈને અન્ય કામોમાં વાપરે છે પરંતુ મીઠાના ઓછા ઉત્પાદનથી તેના ભાવ વધવાની પૂરી શક્યતા વચ્ચે તેની સીધી અસર લોકોના રસોડા પર પણ જોવા મળશે.

Video: ઈન્દોરના રસ્તા પર આ છોકરી પોતાના ડાન્સ મૂવ્સથી રસ્તાનો ટ્રાફિક મેનેજ કરે છે

from Page Array – I Am Gujarat https://ift.tt/32VMjXj