સોનું ઘટ્યું પણ ભારતમાં માંગ ન વધી

72182840

સુતનુકા ઘોસાલ

કોલકાતા:આંતરરાષ્ટ્રીય બજારમાં સોનાના ભાવમાં ઘટાડો થયો હોવા છતાં ભારતીય ગ્રાહકો તેનો ફાયદો લઈ શકે તેવી સ્થિતિમાં નથી. અમેરિકન ડોલર સામે ભારતીય રૂપિયાની નબળાઈ તેના માટે જવાબદાર છે. સોનાની ખરીદીમાં ભારત વિશ્વમાં બીજા ક્રમે સૌથી મોટું બજાર છે. પરંતુ ઊંચા ભાવના કારણે તહેવારની સીઝન દરમિયાન ભારતમાં પીળી ધાતુની માંગમાં 15થી 20 ટકાનો ઘટાડો થયો હતો.

ગુરુવારે કોમેક્સ પર સોનું 1,470 ડોલર પ્રતિ ઔંસના ભાવે ટ્રેડ થતું હતું. અમેરિકા અને ચીનની ડીલ અંગે અનિશ્ચિતતા વચ્ચે સોનાએ મજબૂતી પકડી રાખી હતી. નવેમ્બરમાં સોનામાં વેચાણ જોવા મળ્યું છે. મહિનાના અંત સુધીમાં ચીન અને અમેરિકા વચ્ચે વચગાળાની ટ્રેડ ડીલ થઈ જશે તેવી સંભાવનાથી ભાવમાં ત્રણ ટકાનો ઘટાડો થયો હતો. જોકે, ટ્રેડ અધિકારીઓએ સોદા અંગે સ્પષ્ટ સંકેત આપ્યા ન હોવાથી ગોલ્ડમાં રિસ્ક પ્રીમિયમ ઊંચા સ્તરે જળવાઈ રહ્યું છે.

એચડીએફસી સિક્યોરિટીઝના સિનિયર એનાલિસ્ટ તપન પટેલે જણાવ્યું હતું કે, “રૂપિયો નબળો હોવાના કારણે ભારતમાં સોનાના ભાવમાં ઘટાડો મર્યાદિત હતો. વૈશ્વિક સ્તરે સોનાના ભાવ ઘટ્યા છે. ડિસેમ્બર માટે એમસીએક્સ પર સોનાના ભાવ 10 ગ્રામ દીઠ ₹38,100 પર ટ્રેડ થાય છે. કોમેક્સ ગોલ્ડ પ્રાઇસમાં મોટો ઘટાડો થયો છે પરંતુ ભારતમાં નવેમ્બરમાં ભાવ માત્ર એક ટકા ઘટ્યા છે.”

નવેમ્બરમાં ડોલરની સામે સ્પોટ રૂપિયો 1.50 ટકા ઘટીને 71.82 નજીક ટ્રેડ થતો હતો. તેમણે કહ્યું કે, “એશિયન કરન્સીમાં નબળાઈ, ચીન-અમેરિકા વ્યાપાર સંધિ અંગે અનિશ્ચિતતા, આરબીઆઇ દ્વારા ખરીદીના કારણે રૂપિયો દબાણમાં છે.”

અમેરિકા અને ચીન વચ્ચે નવેસરથી વ્યાપાર તણાવ પેદા થવાના કારણે 2019માં વચગાળાનો સોદો અનિશ્ચિત જણાય છે. નિષ્ણાતો માને છે કે આ સોદો હવે આગામી વર્ષમાં જ થઈ શકશે. વ્યાપાર સંધિ અંગે અનિશ્ચિતતા અને વૈશ્વિક નરમાઈના કારણે સોનાના ભાવને ટેકો મળશે જેમાં 1,445 ડોલરના સ્તરે સપોર્ટ અને 1,490 ડોલરના અવરોધ જોવા મળે છે.

જિયોજિત ફાઇનાન્શિયલ સર્વિસિસના કોમોડિટી રિસર્ચના વડા હરીશ વીએ જણાવ્યું કે આંતરરાષ્ટ્રીય બજારમાં સોનું 5.52 ટકા ઘટીને 1,471 ડોલર પ્રતિ ટ્રોય ઔંસ થયું છે જે 1,557 ડોલરના સ્તર સુધી પહોંચ્યું હતું. પરંતુ સોનાના કિસ્સામાં આ ઘટાડો ₹39,699 પ્રતિ 10 ગ્રામના સ્તર પરથી લગભગ ચાર ટકા જેટલો છે. સોનું 9 સપ્ટેમ્બરે આ સ્તરે પહોંચ્યું હતું.

એચડીએફસી સિક્યોરિટીઝના માનવા પ્રમાણે ભારતમાં સ્પોટ ગોલ્ડ પ્રાઇસ મજબૂત ટકી રહેશે કારણ કે મધ્યમ ગાળામાં એક્સ્ચેન્જના દર નરમ રહેવાની શક્યતા છે. એલકેપી સિક્યોરિટીઝ ખાતે સિનિયર રિસર્ચ એનાલિસ્ટ (કોમોડિટી અને કરન્સી) જતીન ત્રિવેદી માને છે કે ડોલર સામે રૂપિયો નરમ જણાય છે. ડોલરને 71.70ના સ્તરે તાત્કાલિક સપોર્ટ છે પરંતુ તે 72ના સ્તર નજીક પહોંચે ત્યારે તેમાં નબળાઈ દેખાય છે. ડોલર-રૂપીની પેર માટે 71.48 -71.25ના સ્તર નજીક સપોર્ટ છે. સ્પોટ માર્કેટમાં બુલિયન ડીલર્સ પ્રતિ ટ્રોય ઔંસ 1-2 ડોલરનું ડિસ્કાઉન્ટ આપે છે. પરંતુ ભાવ ઊંચા હોવાથી ખરીદનારા બહુ ઓછા છે.

from Page Array – I Am Gujarat https://ift.tt/37A0OU7