મુંબઈ:નવ મોટાં રાજ્યોને GSTના વળતર પેટે કેન્દ્ર સરકાર પાસેથી 2019-’20માં ₹70,000 કરોડ સુધીની રકમ લેવાની બાકી નીકળે છે. રેટિંગ એજન્સી ICRAના અંદાજ મુજબ બાકી રકમની ચુકવણી કેન્દ્ર સરકારના રાજકોષીય દબાણમાં વધારો કરશે. ઉલ્લેખનીય છે કે, કોર્પોરેટ ટેક્સમાં ઘટાડો અને સ્ટિમ્યુલસનાં અન્ય પગલાંને કારણે સરકારની રાજકોષીય ખાધ વધવાનો અંદાજ છે.
ICRAના જણાવ્યા અનુસાર અંદાજ કરતાં ઓછા GST કલેક્શનને કારણે ચાલુ નાણાકીય વર્ષમાં ₹24.6 લાખ કરોડના જુલાઈ 2019ના બજેટ અંદાજની તુલનામાં ₹3.5 લાખ કરોડની ઘટ પડશે. તમામ રાજ્યો માટે 2019-’20માં કુલ ઘટ ₹2.2 લાખ કરોડે પહોંચવાની શક્યતા છે. ઉપરાંત, કેન્દ્ર સરકારને ચૂકવવાની બાકી રકમને જોતાં GST ગ્રાન્ટ રાજ્ય સરકારોને આપવાનો સમય રાજ્યોના કેશ ફ્લો માટે જોખમ ઊભું કરે છે.
ICRAના કોર્પોરેટ સેક્ટર રેટિંગના ગ્રૂપ હેડ જયંત રોયે જણાવ્યું હતું કે, “અમે જે નવ રાજ્યનો અભ્યાસ કર્યો છે તેને 2019-’20માં GST કોમ્પેનસેશન પેટે ₹600-700 અબજની ગ્રાન્ટ આપવી પડે તેવી શક્યતા છે. તેમને 2018-’19માં વળતર પેટે મળેલી રકમ કરતાં આ આંકડો બમણો છે.”
રાજ્યો માટે GST વળતરની બાકી રકમ બે તબક્કામાં જોખમ ઊભું કરે છે. તેમની આવકમાં ઘટાડાને કારણે મહેસૂલી ખર્ચ સંબંધી જોખમ ઊભું થશે, જે લોકકલ્યાણની
યોજનાઓ, દુષ્કાળ અને પૂરરાહત સાથે સંકળાયેલું હશે. બીજી તરફ, ICRAના અંદાજ મુજબ રાજ્યો સ્ટેટ ડેવલપમેન્ટ લોન્સ (SDLs)ની ફાળવણીમાં વધારો કરશે.
અભ્યાસમાં સામેલ કરાયેલા નવ રાજ્યમાં કર્ણાટક, કેરલ, ગુજરાત, મહારાષ્ટ્ર, પંજાબ, હરિયાણા, રાજસ્થાન, તામિલનાડુ અને પશ્ચિમ બંગાળનો સમાવેશ થાય છે. આ રાજ્યોએ તેમના 2019-’20ના બજેટ અંદાજમાં કુલ ₹3 લાખ કરોડની રાજકોષીય ખાધનો અંદાજ નિર્ધારિત કર્યો છે. ICRAના જણાવ્યા અનુસાર આ આંકડો તેમની ગ્રોસ સ્ટેટ ડોમેસ્ટિક પ્રોડક્ટ (GSDP)ના લગભગ 2.5 ટકા છે, જે 14મા નાણાપંચની રાજ્યોની રાજકોષીય ખાધના GSDPના 3 ટકાના થ્રેશોલ્ડ કરતાં ઓછો છે.
from Page Array – I Am Gujarat https://ift.tt/2PFRIhS
No comments:
Post a Comment