અ’વાદઃ ‘પોલીસ’ હોવાનું કહી શખ્સે કર્યો છેડતીનો પ્રયાસ, છોકરી હિંમત બતાવીને ભાગી ગઈ

અમદાવાદઃ ‘પોલીસવાળો છું’ તેવો રોફ બતાવી 17 વર્ષની છોકરીની છેડતી કરવાનો પ્રયાસ કરનાર શખ્સની પોલીસે રવિવારે ધરપકડ કરી હતી. શનિવારના રોજ છોકરી તેના મિત્ર સાથે વિરાટનગરમાં આવેલા સદગુરુ ગાર્ડનમાં બેઠી હતી ત્યારે શખ્સે તેનું અપહરણ કર્યું હતું. જે બાદ તે તેને ઓઢવમાં આવેલા શબરી કોમ્પલેક્સના ધાબા પર લઈ ગયો હતો અને તેની છેડતીનો પ્રયાસ કર્યો હતો. જો કે, છોકરીએ હિંમત બતાવીને શખ્સનો સામનો કર્યો અને ગમે તેમ કરીને તેના ચુંગાલમાંથી ભાગી ગઈ. આ આરોપીની ઓળખ ઘનશ્યામ રાઠોડ તરીકે થઈ છે જેની ઉંમર 28 વર્ષ છે અને તે નિકોલમાં રહે છે.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો:

છોકરી રાઠોડના હાથમાંથી બચી નીકળી અને સીડીથી નીચે ઉતરીને કોમ્પલેક્સમાં આવેલી હોસ્પિટલમાં જતી રહી હતી, જ્યાંથી તેણે પોલીસ કંટ્રોલ રૂમને ફોન કર્યો હતો. ઝોન-5ના ડેપ્યૂટી કમિશનર ઓફ પોલીસ રવિ તેજાએ કહ્યું કે, રાઠોડ સામે ગુનો નોંધ્યો છે. ‘અમે સીસીટીવી ફૂટેજથી તપાસ હાથ ધરી હતી અને રાઠોડને ઝડપી પાડ્યો હતો’ તેમ તેજાએ કહ્યું.

‘અમે અમારા બાતમીદારોને ફૂટેજ બતાવ્યા હતા, જેમાંથી કેટલાકે તેને ઓળખી કાઢ્યો હતો. જે બાદ તેઓ અમને નિકોલમાં આવેલા તેના ઘરે લઈ ગયા હતા. ગુનામાં ઉપયોગમાં લીધેલી બાઈકને તેના ઘર બહાર પાર્ક કરેલી જોતા જ અમને પાક્કી ખાતરી થઈ હતી’, તેમ રવિ તેજાએ જણાવ્યું.

છોકરીએ નોંધાવેલી ફરિયાદ પ્રમાણે, તે 11મા ધોરણમાં ભણે છે અને વિજ્ઞાન પ્રવાહની વિદ્યાર્થિની છે તેમજ તેના માતા-પિતાનું એક માત્ર સંતાન છે. તેના પિતા એક ખાનગી કંપનીમાં નોકરી કરે છે. તેણે ફરિયાદમાં જણાવ્યું કે શનિવારે બપોર પછી તે અને તેનો મિત્ર BRTSથી વિરાટનગર પહોંચયા હતા અને બાદમાં તેઓ સદગુરુ ગાર્ડનમાં ગયા હતા.

છોકરીએ જણાવ્યું કે, જ્યારે તેઓ ગાર્ડનમાં બેસીને અભ્યાસની ચર્ચા કરી રહ્યા હતા ત્યારે રાઠોડ ત્યાં પહોંચ્યો હતો. ‘રાઠોડે પોતાની ઓળખ પોલીસકર્મી તરીકે આપી હતી અને છોકરાને થપ્પડ મારી ત્યાંથી જતા રહેવાનું કહ્યું હતું’, તેમ નિકોલ પોલીસ સ્ટેશનના સૂત્રોએ જણાવ્યું. રાઠોડે છોકરીને કહ્યું કે તેણે તેની સાથે પોલીસ સ્ટેશન આવવું પડશે, જ્યાંથી તે તેના માતા-પિતાને ફોન કરશે. શખ્સે છોકરીને બાઈક પર બેસાડી હતી અને શબરી કોમ્પલેક્સ લઈ ગયો હતો.

જ્યાં રાઠોડે તેને નીચે ઉતારી હતી અને અડપલા કરવાનું શરૂ કરી દીધું હતું. પરંતુ છોકરીએ હિંમત દાખવી અને તેને ધક્કો મારીને હોસ્પિટલમાં જતી રહી. ‘જ્યાં છોકરીએ એક મહિલા પાસેથી ફોન લીધો અને પોલીસ કંટ્રોલ રૂમનો કોલ કરી દીધો’, તેમ પોલીસ સૂત્રોએ જણાવ્યું. ‘પોલીસની ટીમ તાત્કાલિક ઘટનાસ્થળે પહોંચી હતી અને ઘટનાનું રિકન્સ્ટ્રક્શન કર્યા બાદ ફરિયાદ નોંધી હતી’.

પોલીસ સૂત્રોના જણાવ્યા પ્રમાણે, રાઠોડ મશિન ઓપરેટર છે. દોઢ મહિના પહેલા જ તેણે નોકરી ગુમાવી દીધી હતી. ‘જે બાદ તે ગાર્ડનની આસપાસ ફરતો હતો અને કપલ પાસેથી રૂપિયા પડાવતો હતો’, તેમ પોલીસ સૂત્રોએ કહ્યું.

દારુના નશામાં યુવક 50 ફૂટ ઊંચા થાંભલા પર ચડી ગયો 

from Page Array – I Am Gujarat https://ift.tt/2Ekuc3t