ગરમીમાં PPE કિટથી પરસેવાના રેલા ઉતરે છે, છતાંય ફરજમાં અડગ છે પોલીસ અને મેડિકલ સ્ટાફ

કલ્પી ના શકાય તેવી તકલીફો થાય છે

પાર્થ શાસ્ત્રી, અમદાવાદ: કોરોનાથી બચવા હવે પોલીસ પણ પ્રોટેક્શન સૂટ પહેરીને ફરજ બજાવી રહી છે. જોકે, આકરા ઉનાળાની કાળઝાળ ગરમીમાં આખુંય શરીર કવર થઈ જાય તેવો પ્રોટેક્શન સૂટ પહેરી કોરોનાગ્રસ્ત વિસ્તારોમાં નોકરી કરવી આપણે કલ્પના પણ ના કરી શકીએ તેટલી અઘરી છે.

સતત 3-4 કલાક પ્રોટેક્શન સૂટ પહેરી ફરવું પડે છે

દરિયાપુર પોલીસ સ્ટેશનમાં ફરજ બજાવતા કોન્સ્ટેબલ ભરત મકવાણાને પેટ્રોલિંગમાં જતાં પહેલા પ્રોકેક્શન સૂટ તેમજ અન્ય પર્સનલ પ્રોટેક્શન ઈક્વિપમેન્ટ્સ પહેરવા પડે છે. જેને યોગ્ય રીતે પહેરવામાં 15-20 મિનિટનો સમય લાગે છે, અને કોઈકની મદદ પણ લેવી પડે છે. જુતાને ઢાંકવા ઉપરાંત હાથમોજાં અને ગોગલ્સ પણ પહેરવા પડે છે. એકવાર PPE કિટ પહેરી લીધી તે પછી સતત 3-4 કલાક તેને પહેરીને જ કામ કરવું પડે છે.

પરસેવાના રેલા ઉતરે છે

પોલીસને અગાઉ ક્યારેય આવી સ્થિતિમાં ફરજ બજાવવી પડી નથી. કોરોનાગ્રસ્ત વિસ્તારોમાં બંદોબસ્ત દરમિયાન કેટલાક પોલીસકર્મીઓને ચેપ લાગી જતાં આખરે તમામને PPE કિટ્સ આપવામાં આવી છે. મંગળવારે અમદાવાદમાં તાપમાન 41.8 ડિગ્રીએ પહોંચ્યું હતું. તેવામાં હવાની બિલકુલ અવરજવર ના થઈ શકે તેવી PPE કિટ પહેરીને ફરજ બજાવતા પોલીસકર્મીઓ પરસેવે રેબઝેબ થઈ જતાં હોય છે.

હાથ પાણીમાં ડબોળી રાખ્યા હોય તેવા થઈ જાય છે

દરિયાપુરમાં જ ફરજ બજાવતા એલઆરડી જવાન વસીમ સૈયદ જણાવે છે કે, પીપીઈ કિટ કાઢ્યા બાદ હાથ જાણે કલાકો સુધી પાણીમાં બોળેલા રાખ્યા હોય તેવા થઈ જાય છે. આવી જ હાલત પીપીઈ કિટ પહેરી ફરજ બજાવતા હેલ્થ વિભાગના સ્ટાફની પણ છે. કાળઝાળ ગરમીમાં પીપીઈ કિટ પહેરી સતત ફરતા રહેવાના કારણે ખૂબ પરસેવો થવાથી ડિહાઈડ્રેશનની સમસ્યા પણ થાય છે.

ડોક્ટરોની હાલત પણ કફોડી

સિવિલ હોસ્પિટલમાં ફરજ બજાવતા એક જુનિયર ડોક્ટર જણાવે છે કે પીપીઈ કિટ્સની અછત હોવાથી એક વ્યક્તિએ તે પહેરી સતત છ કલાક કામ કરવું પડે છે. શરીર પરસેવાથી રેબઝેબ થઈ જાય છે. પ્રોટેક્શનના સૂટના કિનારા પર પરસેવો શોષાઈ જાય તેવો પાવડર હોય છે, પરંતુ એક હદ પછી તે પણ નકામો બની જાય છે.

બે જોડી કપડાં લઈ આવવું પડે છે

હોસ્પિટલના ઈન્ચાર્જ સુપ્રિન્ટેન્ડેન્ટ જેપી મોદીના જણાવ્યા અનુસાર, હવે ડોક્ટરો બે જોડી કપડાં લઈ આવે છે. એક પીપીઈ કિટ પહેરતી વખતના, અને બીજા કિટ કાઢ્યા બાદ પહેરવાના. પીપીઈ કિટને કારણે ખૂબ જ પરસેવો થતો હોવાથી મેડિકલ સ્ટાફને ફરજ દરમિયાન જરુર પડે તો વોર્ડની બહાર આવવાની પણ છૂટ છે. તેમના કામકાજના કલાકો પણ ઘટાડી દેવામાં આવ્યા છે.

from Page Array – I Am Gujarat https://ift.tt/2xhQO4R