કોરોના બેકાબુ: અમદાવાદમાં નવા નોંધાયેલા 153માંથી 86 કેસ માત્ર પશ્ચિમ ભાગના

અમદાવાદ: શહેરના પશ્ચિમ ભાગના છેલ્લા પખવાડિયાથી 50 ટકાથી વધુ નવા કેસો નોંધાયા છે. શુક્રવારે છેલ્લા 24 કલાકમાં અમદાવાદમાં કુલ નોંધાયેલા 153માંથી 86 એટલે કે 57 ટકા કેસ પશ્ચિમ ભાગના છે. શુક્રવારે AMCના સાતેય ઝોનમાં સૌથી વધુ 39 કેસ પશ્ચિમ ઝોનમાં નોંધાયા છે. જેમાં સ્ટેડિયમ, નારણપુરા, નવરંગપુરા, રાણીપ, પાલડી અને વાસણા વોર્ડનો સમાવેશ થાય છે. તેના આગલા દિવસે પણ શહેરમાં 153 નવા કેસ નોંધાયા હતા. જોકે, શનિવારે શહેરનામાં કોરોનાના નવા 166 દર્દીઓ નોંધાયા છે.

પશ્ચિમ ઝોન ઉપરાંત ઉત્તર-પશ્ચિમ ઝોનના થલતેજ બોડકદેવ, ઘાટલોડિયા અને ગોતામાંથી નવા 29 કેસ સામે આવ્યા છે. તેમજ પૂર્વ ઝોનમાં કોરોનાના નવા 25 દર્દીઓનો કોરોનાનો રિપોર્ટ પોઝિટિવ આવ્યો છે. જેમાં વિરાટનગર, નિકોલ, ગોમતીપુર, ઓઢવ, વસ્ત્રાલ અને અમરાઈવાડીનો સમાવેશ થાય છે. ત્યારબાદ દક્ષિણ-પશ્ચિમ ઝોનના જોધપુર, વેજલપુર, મકતમપુરા અને સરખેજમાં નવા 18 કેસ નોંધાયા છે. શુક્રવારે કોરોનાથી 5 દર્દીઓના મોત પણ થયા છે. જેમાં મધ્ય, ઉત્તર, દક્ષિણ, પૂર્વ અને ઉત્તર-પશ્ચિમ ઝોનમાં એક-એક દર્દીનું મૃત્યુ થયું છે. AMCના અધિકારીઓના જણાવ્યા મુજબ પાંચમાંથી 4 મોત ખાનગી હોસ્પિટલ જ્યારે એક મોત એસવીપી હોસ્પિટલમાં થયું છે.

ગુરુવારે પણ અમદાવાદમાં નોંધાયેલા કુલ 153માંથી 88 કેસ શહેરના પશ્ચિમ ભાગમાં જ નોંધાયા હતા. જેમાં પશ્ચિમ ઝોનમાં 33 કેસ જ્યારે ઉત્તર-પશ્ચિમ ઝોનમાં સાતેય ઝોન કરતા સૌથી વધુ 34 કેસ સામે આવ્યા હતા. એટલું જ નહીં, દક્ષિણ પશ્ચિમ ઝોનમાં પણ કોરોનાના નવા 21 દર્દીઓ ઉમેરાયા હતા.

શનિવાર સવારની પરિસ્થિતિએ પશ્ચિમ વિસ્તારમાં કોરોનાના 48 ટકા એક્ટિવ કેસ છે. અમદાવાદમાં કોરોનાના કુલ 3138 એક્ટિવ કેસ છે. જેમાં સૌથી વધુ 1504 પશ્ચિમ વિસ્તારના છે. જેમાંથી પશ્ચિમ ઝોનમાં 580 કેસ, ઉત્તર-પશ્ચિમ ઝોનમાં 476 કેસ અને દક્ષિણ-પશ્ચિમ ઝોનમાં 451 કેસ એક્ટિવ છે. આ ઉપરાંત મધ્ય ઝોનમાં 246 કેસ, ઉત્તર ઝોનમાં 483 કેસ, પૂર્વ ઝોનમાં 483 કેસ અને દક્ષિણ ઝોનમાં 447 કેસ એક્ટિવ છે.

અમદાવાદના ગ્રામ્ય વિસ્તારમાં નવા 12 કેસ
શનિવારે અમદાવાદના ગ્રામ્ય વિસ્તારોમાં કોરોનાના નવા 12 કેસ નોંધાતા કુલ કેસોનો આંકડો 946 પર પહોંચી ગયો છે. રોજ નોંધાતા આંકડા મુજબ હવે અમદાવાદના ગ્રામ્ય વિસ્તારોમાં દરરોજ સરેરાશ 15 કેસ નોંધાઈ રહ્યા છે. શનિવાર સુધીના આંકડા મુજબ અમદાવાદ જિલ્લામાં 2453 લોકો હોમ ક્વોરેન્ટાઈન હેઠળ છે.

from Page Array – I Am Gujarat https://ift.tt/2DC3GWp