મારું એક જ લક્ષ્ય છે કોંગ્રેસને સત્તામાં લાવવીઃ હાર્દિક પટેલ એક્સક્લુઝિવ

કપિલ દવે, અમદાવાદઃ ગુજરાત કોંગ્રેસના પ્રદેશ પ્રમુખ પદ પર વરણી થયેલા હાર્દિક પટેલ ભલે કહે કે તેનું લક્ષ્ય 2022માં ગુજરાતમાંથી ભાજપને સત્તાના સિંહાસનથી ઉતારીને કોંગ્રેસને સત્તામાં લાવવાનું છે પરંતુ હકીકતમાં પહેલી ચેલેન્જ તો ગુજરાતમાં તૂટી રહેલી કોંગ્રેસને બચાવવાની અને આંતરિક કલહને થાળે પાડવાની છે. 26 જ વર્ષના આ યુવા નેતા સાથે અમારા સહયોગી ટાઇમ્સ્ ઓફ ઇન્ડિયાના કપિલ દવે ખાસ વાતચીત કરી હતી જેના અંશ…

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો:

આ વાતચીતની શરુઆતમાં જ હાર્દિકે કહ્યું કે હું ગુજરાત કોંગ્રેસના કાર્યકર તરીકે રાજ્યના 16000 ગામડાઓમાં ફરીશ અને રાજ્યમાં કોંગ્રેસનો પાયો મજબૂત કરીશ. આગામી વિધાનસભા ચૂંટણીમાં મારું લક્ષ્ય કોંગ્રેસને સત્તા સ્થાને લાવવાનું છે.

આટલી નાની ઉંમરે ગુજરાત પ્રદેશ કોંગ્રેસના કાર્યકારી પ્રમખ તરીકે તમારી વરણી થતા કેવું અનુભવ કરો છો?

– મારી એક જ પ્રાથમિક્તા છે ગુજરાતમાં 2022માં કોંગ્રેસને સત્તાની દોરી આપવી અને મને વિશ્વાસ છે કે આગામી વિધાનસભા ચૂંટણીમાં ગુજરાત કોંગ્રેસ આ લક્ષ્ય હાંસીલ કરશે. જ્યારે મારું હાલનું લક્ષ્ય ગુજરાતમાં આવી રહેલી પેટાચૂંટણીઓમાં કોંગ્રેસને વિજેતા બનાવવાનું છે.

2022 માટે તમારો એક્શન પ્લાન શું હશે?

– હું 2022 પહેલા ગુજરાતના 16000 ગામડાઓમાં ફરીશ અને પાર્ટીના કાર્યકર્તાઓને મળીશ અને ગ્રામ્ય સ્તરથી પાર્ટીને મજબૂત કરીશ. અમે સમાજના ઉપેક્ષિત વર્ગો, ખેડૂતો અને યુવાનોનો અવાજ બનીશું.

શું તમે 2022માં ચૂંટણી લડશો?

– ગુજરાતમાં ભાજપની સરકાર દ્વારા મારી સામે કરવામાં આવેલ ખોટા કેસના કારણે કદાચ બની શકે કે હું ચૂંટણી ન લડી શકું. જોકે હું ચૂંટણી લડવા પર નહીં પણ 2022માં કોંગ્રેસને વિધાનસભા ચૂંટણીમાં ભવ્ય વિજય અપાવવા માટે ફોકસ કરી રહ્યો છું.

ગુજરાત કોંગ્રેસમાં રહેલા વિખવાદ અને રાજ્યના વિરિષ્ઠ નેતાઓની નારાજગીનું શું કરશો?

– મને પક્ષના તમામ વરિષ્ઠ નેતાઓનો સહયોગ અને માર્ગદર્શન છે. મારી પાસે એક ક્લિયર વિઝન છે અને અમે બધા સાથે મળીને કરીશું અને ભાજપને ચોક્કસ પણ રાજ્યમાં અને દેશમાં બંને જગ્યાએ હરાવીશું.

શું એક મજબૂત પાટીદાર સમાજના નેતા તરીકેની છાપ હવે તમારા માટે ફાયદાકારક છે કે બાધારુપ છે?

– પહેલા હું સામાજીક આગેવાન હતો. હવે હું રાજકીય આગેવાન છું. હવે હું દરેકનો અવાજ છું. હું બેરોજગાર યુવાનો, ખેડૂતો, મહિલાઓ અને જેમને પણ જરુરિયાત છે તે દરેક માટે કામ કરતો રહીશ. હું જ્ઞાતિ અને ધર્મના ભેદભાવ કરતો નથી.

from Page Array – I Am Gujarat https://ift.tt/2Zlxu1W