વજન ઉતારવાનો શોર્ટ કટ છે બેરિયાટ્રિક સર્જરી, કરાવવાનો વિચાર હોય તો આટલું જાણી લો

વજન ઉતારવાનો શોર્ટકટઃ

સોશિયલ મીડિયાના જમાનામાં દેખાવનું મહત્વ એટલું વધી ગયું છે કે પરફેક્ટ દેખાવા માટે લોકો કોઈપણ હદ સુધી જઈ શકે છે. આ સાથે જ બોડી શેપમાં રાખવાનો ક્રેઝ પણ વધી ગયો છે. આથી જ લોકો યોગ-જિમથી માંડીને વજન ઉતારવાના જાતજાતના નુસખા અમલમાં મૂકે છે. પરંતુ આ બધું કરાવ્યા પછી રિઝલ્ટ ન મળતું હોય તો વધુ વજન ધરાવતા લોકોને સર્જરીનો વિચાર ચોક્કસ આવી જાય. છેલ્લા દાયકામાં બેરિયાટ્રિક એટલે કે વજન ઘટાડવાની સર્જરીના કેસમાં અધધ વધારો થયો છે. હવે માત્ર 200-250 કિલો વાળા જ નહિ, 100-125 કિલો વાળા લોકો પણ સર્જરીનો શોર્ટકટ લઈને વજન 30-40 કિલો વજન ઉતારી રહ્યા છે. સ્થૂળતા માટે બેરિયાટ્રિક સર્જરીને એક સારો વિકલ્પ ગણવામાં આવે છે અને અનેક કેસમાં તે વજન ઉતારવામાં સારુ રિઝલ્ટ પણ આપે છે. આ સર્જરી કરાવવાનો ખર્ચો ત્રણ લાખથી પાંચ લાખ જેટલો થાય છે. જો તમારા મનમાં પણ આ સર્જરી કરાવવાનો વિચાર આવતો હોય તો આટલું ચોક્કસ જાણી લો.

હવે એક મેસેજ મોકલી WhatsApp પર મેળવો અમારા ન્યુઝ, Start કરવા અહીં ક્લિક કરો

બેરિયાટ્રિક સર્જરી કેવી રીતે કામ કરે છે?

આ સર્જરીમાં તમારા પાચનતંત્રમાં એવા ફેરફાર કરવામાં આવે છે જેથી તમે ખોરાક જ ઓછો લઈ શકો અથવા તો તમારા શરીરમાં વધુ ન્યુટ્રિયન્ટ્સ ન શોષાય. બેરિયાટ્રિક સર્જરીના અનેક પ્રકાર છે જેમાં સૌથી સામાન્ય ગેસ્ટ્રિક બાયપાસ સર્જરી છે. અન્ય સર્જરી કરતા તેમાં કોમ્પ્લિકેશન ઓછા હોય છે. બેરિયાટ્રિક સર્જરી પછી તમારામાં હોર્મોનલ ફેરફારો થાય છે જેને કારણે તમારી કેલરી વધુ વપરાય છે. આખી તમે ડાયેટ કરીને વજન ઉતારો તેના કરતા સર્જરીથી ઉતારેલા વજનની ઈફેક્ટ લાંબો સમય સુધી રહે છે.

કોણ કરાવી શકે આ સર્જરી?

વજન ઉતારવું એ ખૂબ જ મહેનતનું કામ છે. એમાંય વર્ષો સુધી કશું ન કર્યું હોય અને શરીર પર ચરબીના થર જામી ગયા હોય ત્યારે વજન ઉતારવું અશક્ય લાગે છે. એટલે જ વધુ વજન ધરાવતા લોકો માટે બેરિયાટ્રિક સર્જરી પાતળા થવાનો એક શોર્ટકટ છે. પરંતુ બેરિયાટ્રિક સર્જરી ત્યારે જ કરી શકાય જ્યારે વ્યક્તિએ ડાયેટ, કસરત કરીને વજન ઉતારવાની કોશિશ કરી હોય પરંતુ સફળતા ન મળી હોય. જે વ્યક્તિનો BMI 40 કરતા વધારે હોય અને વજન શરીરની જરૂરિયાત કરતા 45 કિલો કે તેથી વધારે હોય. આ ઉપરાંત વધુ વજનને કારણે તમને ટાઈપ ટુ ડાયાબિટિસ, હાઈ બીપી અથવા તો સ્લીપ એપનિયા જેવી સમસ્યા થઈ હોય તો પણ સર્જરીનો આશ્રય લઈ શકાય. ડોક્ટરો સર્જરીની સલાહ આપતા પહેલા વધુ વજનને કારણે તમને કેવી સમસ્યા થઈ રહી છે તેના પર પણ ધ્યાન આપે છે. યાદ રાખો, જ્યાં સુધી કસરત અને ડાયેટિંગથી વજન ઉતારવામાં પરિણામ મળતા હોય તો સર્જરીનો વિચાર સુદ્ધાં ન કરવો જોઈએ.

આ બાબત ધ્યાનમાં રાખોઃ

સર્જરી પહેલા તમારા ન્યુટ્રિશન અને વજનની હિસ્ટ્રી, ખાવાપીવાની આદતો, વ્યાયામનું શિડ્યુલ, સ્ટ્રેસ, સમયની અછત વગેરે તમામ બાબતો પર ડોક્ટર ધ્યાન આપે છે. સર્જરીને કારણે શરીરમાં લોહીના ગઠ્ઠા જામી જવા, લીવરની બીમારી, હાર્ટની તકલીફ, કિડનીમાં પથરી અને કુપોષણ જેવી સમસ્યા થઈ શકે છે. આથી તમે ડ્રિન્ક કરો છો, સ્મોક કરો છો, કેવી દવાઓ લો છો વગેરે ટેસ્ટિંગ પણ સર્જરી પહેલા કરવામાં આવે છે. આ સાથે સાથે તમે માનસિક રીતે સર્જરી માટે કેટલા તૈયાર છો તે પણ ધ્યાનમાં લેવામાં આવે છે. આથી સર્જરી પહેલા તમારે શારીરિક અને માનસિક રીતે તૈયાર હોવું જરૂરી છે.

તો વધી શકે છે વજનઃ

એકવાર સર્જરી કરાવી લો એટલે તમને આજીવન વજન વધવામાંથી છૂટકારો મળશે એવા વહેમમાં ન રહેશો. સર્જરી પછી પણ તમારે ડાયેટ અને એક્સરસાઈઝ ચાલુ રાખવા પડે છે. જો તમે તમારી લાઈફસ્ટાઈલ નહિ બદલો તો સર્જરી પછી પણ તમારુ વજન વધી શકે છે.

ક્યારે મળે છે રિઝલ્ટ?

આ સર્જરીમાં તમને જ્યાં કાપો મૂક્યો હશે ત્યાં થોડા દિવસ દુઃખાવો થશે પણ તે રિકવર થઈ જશે. સર્જરીના રિઝલ્ટ ત્રણ કે છ મહિના સુધીમાં જોવા મળે છે. સફળ સર્જરીમાં એક વર્ષ સુધીના ગાળામાં વ્યક્તિ પોતાના વધારાના વજનમાંથી મોટા ભાગનું વજન ઉતારવામાં સફળ રહે છે. પરંતુ એ વાત યાદ રાખવી જોઈએ કે સર્જરી કરાવ્યા બાદ પણ તમારે લાઈફસ્ટાઈલ ચેન્જ કરવી જરૂરી છે. સર્જરી બાદ તમે બેઠાડુ જીવન જીવશો કે ખાવા પર કંટ્રોલ નહિ રાખો તો તમને વજન ઉતારવામાં સફળતા નહિ મળે. જો સર્જરી વિના જ તમે ડાયેટ-એક્સરસાઈઝથી વજન ઉતારી શકતા હોવ તો સર્જરીનો વિચાર પણ કરવો ન જોઈએ.

from Health News in Gujarati: Latest Health News, Read Breaking Health News on Iamgujarat.com – Page Array – I Am Gujarat http://bit.ly/2WRcdt4