IPO દુષ્કાળઃ ચાર વર્ષ પછી મેમાં એક પણ નહીં!

69519539

બીરજુ શાહ

અમદાવાદ:IPO માર્કેટમાં ચૂંટણીને કારણે દુષ્કાળની સ્થિતિ સર્જાઈ છે. મે 2019માં એક પણ કંપનીઓ મૂડીબજારમાં પ્રવેશી નથી. આ ઘટના ચાર વર્ષ પછી પહેલીવાર બની છે.

ચૂંટણી વર્ષ 2014માં પણ સમાન સ્થિતિ હતી અને મે મહિનામાં એક પણ કંપનીના IPO આવ્યા નહોતા. જોકે, હવે સ્થિર સરકાર આવતા અને NDAની જ સરકાર રહેતાં પોલિસી મેટર સમાન રહેવાની આશાએ અને શેરબજારમાં તેજીનો માહોલ રહેતાં જૂન-જુલાઈથી IPO માર્કેટમાં ચહલપહલ શરૂ થવાની આશા રાખવામાં આવે છે. મેઇન પ્લેટફોર્મની સાથે સાથે SME માર્કેટમાં પણ IPO આવતા અટકી ગયા હોવાનું જોવાયું છે.

હાલમાં એક પણ IPO SME સેગમેન્ટમાં પણ ખૂલતો નથી. IPO માર્કેટ સાથે સંકળાયેલા વર્ગનું કહેવું હતું કે, જૂન મધ્ય સુધી સ્થિતિમાં સુધારો આવે તેવી શક્યતા ઓછી છે. સરકાર પણ ડિસઇન્વેસ્ટમેન્ટની પ્રોસેસ બજેટ પછી જ શરૂ કરશે અને બજેટની જાહેરાત જુલાઈમાં થવાની શક્યતા છે. એટલે હવે ચોમાસાની સાથે જ IPO માર્કેટમાંથી દુકાળની સ્થિતિ ઓસરે એવી અપેક્ષા રાખવામાં આવે છે.

મે મહિનો આમ પણ મોટા ભાગનાં વર્ષોમાં IPO માર્કેટ માટે સુસ્ત જ જોવાયો છે. 2017માં ચાર IPOને બાદ કરતાં મોટા ભાગનાં વર્ષોમાં એક IPO જ આવ્યા છે. આનું કારણ જણાવતાં CMS એડ્વાઇઝર્સના MD હિતેશ મહેતાનું કહેવું હતું કે, ઉનાળાની રજાઓમાં IPO માર્કેટમાં કંપનીઓ પણ વેકેશન ઊજવવાના મૂડમાં હોય તેવો ટ્રેન્ડ જોવાયો છે. મે મહિના માટે કહેવત છે કે સેલ ઈન મે એન્ડ ગોલ અવે. આવું જ કંઈક વાતાવરણ એકાદ વર્ષને બાદ કરતાં મોટા ભાગનાં વર્ષોમાં IPO માર્કેટમાં જોવાયું છે.

આ વર્ષે ચૂંટણીનો માહોલ રહેતાં શેરબજારમાં અસ્થિરતાના માહોલને કારણે અને પરિણામ અંગે જાત જાતની અટકળોથી મર્ચન્ટ બેન્કરો દ્વારા જ કંપનીઓને હાલ IPO માર્કેટથી દૂર રહેવાની સલાહ આપવામાં આવતી હતી.

મેઇન બોર્ડ પર સાવેચતીનો માહોલ છેક SME પ્લેટફોર્મ સુધી પહોંચ્યો હતો અને ચાલ વર્ષના પ્રથમ પાંચ મહિનામાં SME સેગમેન્ટમાં માત્ર 25 ઇશ્યૂ જ આવ્યા હતા અને કંપનીઓએ ₹421 કરોડ ઊભા કર્યા હતા. SME સેગમેન્ટમાં પણ અગાઉની સરખામણીએ કંપનીઓએ વધુ સંખ્યામાં નાણાં ઊભા કરતા ઓછા IPO છતાં વધુ રકમ જોવાઈ છે.

મર્ચન્ટ બેન્કિંગનું કામકાજ કરતાં વર્ગમાંથી મળતી માહિતી અનુસાર, આ વર્ષે ચૂંટણીમાં ભાજપને આટલી મોટી બહુમતી મળે તેવી આશા નહોતી અને હંગ પાર્લામેન્ટની સંભાવના વધુ હતી. પાકિસ્તાનમાં એર સ્ટ્રાઇક કરવામાં આવી તે પહેલાં એક સરવે અનુસાર NDA ઘટકને મહત્તમ 210 બેઠકો મળવાની સંભાવના વ્યક્ત કરાતી હતી. આને કારણે પાંચથી છ કંપનીઓએ રાજકીય ચિત્ર સ્પષ્ટ થાય પછી IPO કરવાની તૈયારી દર્શાવી હતી. ચાલુ વર્ષના પ્રથમ ચાર મહિના દરમિયાન એપ્રિલ સૌથી વધુ એક્ટિવ મહિનો હતો અને છ IPOમાંથી ત્રણ તો એપ્રિલમાં જ આવ્યા હતા.

ફેબ્રુઆરીમાં પણ એક પણ IPO મેઇન પ્લેટફોર્મ પર આવ્યા નહોતા. સૂત્રોનું કહેવું હતું કે, જૂન મધ્યથી વાતાવરણ સુધરશે અને વર્ષના અંત સુધીમાં ઓછામાં ઓછા પંદરેક IPO મેઇન પ્લેટફોર્મ પર લિસ્ટેડ થઈ શકે છે. આમાં સરકારની ડિસઇન્વેસ્ટમેન્ટ યોજના હેઠળ વધુ કેટલાક PSUનું લિસ્ટિંગ થવાની પણ સંભાવના જોવામાં આવે છે. મેઇન પ્લેટફોર્મમાં વિશ્વાસ પાછો ફરતા તેની અસર SME સેગમેન્ટમાં પણ જોવાશે એવી આશા દર્શાવવામાં આવતી હતી.

જોકે, વળતરની દૃષ્ટિએ 2019નું વર્ષ રોકાણકારો માટે લાભદાયક પુરવાર થયું છે અને નવા લિસ્ટેડ થયેલા મોટા ભાગના IPOમાં પોઝિટિવ વળતર જોવાયું છે. ચાલુ વર્ષે આવેલા આઇપીમાં સૌથી વધુ વળતર નિયોજેન કેમમાં 37 ટકાનું જોવાયું છે. ત્યાર બાદ રેલ વિકાસ નિગમમાં 35 ટકા, શેલેટ હોટેલમાં 19.6 ટકા, એમ્બેસી રિટ્સમાં 15.6 ટકા અને પોલિકેમમાં 12.3 ટકાનું મળ્યું છે. એકમાત્ર એમએસટીસીમાં રોકાણકારોને નેગેટિવ 18.7 ટકા વળતર છૂટે છે.

from Page Array – I Am Gujarat http://bit.ly/2I4umxf