રુચિ સોયા માટે પતંજલિ PSU બેન્કોની લોન લેશે

69576014

સલોની શુક્લા/સૈકત દાસ

મુંબઈ: બાબા રામદેવની પતંજલિ આયુર્વેદે નાદારી નોંધાવનારી રુચિ સોયા લિને ₹4,350 કરોડમાં ખરીદવાનો સોદો પાર પાડવાના ફંડ માટે જાહેર ક્ષેત્રની બેન્કોનો સંપર્ક સાધ્યો છે. પતંજલિએ પહેલાં નોન-બેન્કિંગ ફાઇનાન્સ કંપનીઓ પાસેથી ફંડ મેળવવાની યોજના ઘડી હતી પરંતુ તે સફળ ન થતાં તેણે આ બેન્કોનો સંપર્ક કર્યો છે એમ આ હિલચાલથી પરિચિત બે વ્યક્તિએ જણાવ્યું હતું.

પતંજલિ પાંચ વર્ષ કે તેનાથી વધારે મુદત માટે ડેટ ફંડ્સ મેળવવા તરફ નજર ફેલાવી રહી છે. તે SBI, PNB, બેન્ક ઓફ બરોડા, યુનિયન બેન્ક અને J&K બેન્ક પાસેથી
₹3,700 કરોડનું ડેટ ફંડ મેળવવા સક્રિય છે જ્યારે બાકીના ₹600 કરોડની વ્યવસ્થા આંતરિક સંસાધનો મારફતે કરશે.

એક પરિચિત વ્યક્તિએ જણાવ્યું હતું કે, “ફંડ મેળવવા માટે અંતિમ તબક્કાની મંત્રણા ચાલી રહી છે અને વ્યાજના દરનો નિર્ણય ટૂંક સમયમાં લેવાઈ જશે. પતંજલિએ પહેલાં ઘણી નોન-બેન્કિંગ ચેનલ્સનો સંપર્ક સાધ્યો હતો પરંતુ આ કંપનીઓએ વધારે ચુસ્ત નિયમો બતાવ્યા હોવાથી પતંજલિએ અન્ય વિકલ્પ શોધ્યો હતો.”

ઇકોનોમિક ટાઇમ્સે ઇ-મેઇલ દ્વારા પતંજલિ, SBI, PNB, બેન્ક ઓફ બરોડા, યુનિયન બેન્ક અને J&K બેન્કનો સંપર્ક સાધ્યો હતો પરંતુ તેમના તરફથી કોઈ જવાબ
મળ્યો નહોતો.

રુચિ સોયા પાસેથી ₹9,300 કરોડની રિકવરી માટે લેન્ડર્સે ઇન્સોલ્વન્સી હરાજી કરી હતી જેમાં પતંજલિને 96 ટકા વોટ મળતાં તે રુચિ સોયાને ખરીદવાના સોદામાં સફળ રહી હતી. રુચિ સોયા પાસેથી જે બેન્કોએ વસૂલાત કરવાની છે તેમાં SBIના ₹1,800 કરોડ, સેન્ટ્રલ બેન્ક ઓફ ઇન્ડિયાના ₹816 કરોડ અને પંજાબ નેશનલ બેન્કના ₹743 કરોડ છે.

રુચિ સોયા માટે શરૂઆતમાં અદાણી વિલ્મરે રસ દર્શાવ્યો હતો અને ગયા વર્ષના ઓગસ્ટમાં સૌથી ઊંચી બિડ પણ કરી હતી, પરંતુ બાદમાં ડિસેમ્બર 2018માં તેણે રુચિ સોયાના રિઝોલ્યુશન પ્રોફેશનલને રિઝોલ્યુશન પ્રોસેસમાં વધારે પડતો વિલંબ થઈ રહ્યો હોવાનું લેખિતમાં જણાવ્યું હતું.

અદાણી વિલ્મર અને પતંજલિ વચ્ચે આ સોદા માટે લાંબી સ્પર્ધા ચાલી હતી. બાદમાં અદાણી વિલ્મર રેસમાંથી નીકળી ગઈ હતી એટલે પતંજલિ એકલી બચી હતી અને તેણે એપ્રિલમાં તેની બિડમાં ₹200 કરોડનો ઉમેરો કરીને ₹4,350 કરોડની ઓફર કરી હતી, જેમાં ₹1,700 કરોડના મૂડીરોકાણનો સમાવેશ થતો નથી.

રુચિ સોયાનું એક્વિઝિશન કરવાથી પતંજલિ ભારતના સોયાબીન ઓઇલ અને અન્ય પ્રોડક્ટ્સના માર્કેટમાં અગ્રણી કંપની બની જશે. પતંજલિએ શરૂઆતનાં વર્ષોમાં જે વૃદ્ધિદર હાંસલ કર્યો છે તે હવે હાંસલ કરવામાં મુશ્કેલી પડી રહી છે તેવા સમયે રુચિ સોયાને કારણે તેને ફાયદો થવાની અપેક્ષા છે.

from Page Array – I Am Gujarat http://bit.ly/2Z3OFSH