પ્રીમિયમ વેલ્યુએશનથી લાર્જકેપ્સ ઊતરતો દેખાવ કરશે

69581317

વિનોદ નાયર, હેડ, રિસર્ચ, જિયોજિત ફાઇનાન્શિયલ સર્વિસિસ

લોકસભાની ચૂંટણીના મજબૂત રિઝલ્ટને પગલે બજારની ચિંતામાં ઘટાડો થયો છે. ચૂંટણીના રિઝલ્ટથી આઉટલૂકમાં સુધારો થયો છે અને રોકાણકારોની જોખમ લેવાની ક્ષમતા પરત આવી છે. આગામી એકથી બે ક્વાર્ટરમાં અર્થતંત્રમાં વધુ સારા ભાવિની ધારણાએ બજારમાં વ્યાપક તેજી આવી હતી. વોલેટિલિટી ઇન્ડેક્સ 50 ટકા ઘટીને 16.5 થયો હતો. આકર્ષક ભાવ અને વેલ્યુએશનને કારણે મિડ-કેપ અને સ્મોલ શેરોએ ચડિયાતો દેખાવ કર્યો છે. છેલ્લાં કેટલાંક સેશન દરમિયાન ભાવમાં મજબૂત તેજી આવી હોવા છતાં મિડ-કેપ અને સ્મોલ-કેપ શેરોમાં રોકાણ હજુ પણ આકર્ષક છે.

વૃદ્ધિલક્ષી એજન્ડાની આગેવાની હેઠળ 2019-’20ના નાણાકીય વર્ષના બીજા છ મહિનાથી અર્થતંત્રમાં રિકવરી આવવાની ધારણા છે. સરેરાશ ધોરણે જોઈએ તો મિડ-કેપ અને સ્મોલ-કેપ શેરો આગામી એક વર્ષની અંદાજિત કમાણીના 15 ગણા પીઇએ ઉપલબ્ધ છે. આ શેરોનું છેલ્લાં પાંચ વર્ષનું સરેરાશ વેલ્યુએશન 18 ગણું અને ટોચનું વેલ્યુએશન 25 ગણું છે. આગામી બજેટ અને સુધારાની ધારણાએ બજારનો આંતરપ્રવાહ મજબૂત રહેશે.

હાલના સમયગાળામાં પ્રીમિયમ વેલ્યુએશનને કારણે લાર્જ-કેપ શેરો ઊતરતો દેખાવ કરે તેવી ધારણા છે, પરંતુ વેલ્યુએશનના રિ-રેટિંગની આગેવાની હેઠળ બ્રોડર માર્કેટનું આકર્ષણ જળવાઈ રહેવાની ધારણા છે. એફઆઇઆઇ અને મ્યુચ્યુઅલ ફંડ્સની વધુ સારી લિક્વિડિટી ઘરેલુ બજારમાં પોઝિટિવ સેન્ટિમેન્ટને જાળવી રાખશે.

આર્થિક નરમાઈ દૂર કરવા માટે સુધારાના આગામી તબક્કા પર ફોકસ અને રાજકીય જોખમમાં ઘટાડાને કારણે બજારનું સેન્ટિમેન્ટ હકારાત્મક રહેશે. જોકે તાજેતરમાં વૈશ્વિક બજારો થોડો વોલેટાઇલ બન્યા છે, પરંતુ ભારત સારો દેખાવ કરી રહ્યું છે. ભારતમાં ઊંચા વિદેશી ફંડ્સથી બજાર આ હકારાત્મક ટ્રેન્ડ જાળવી રાખે તેવી ધારણા છે.

અમે 31 માર્ચ 2019એ નિફ્ટી માટે 12,000નો એક વર્ષનો ટાર્ગેટ આપ્યો હતો, જેને ચોથા ક્વાર્ટરના રિઝલ્ટ અને ચૂંટણીના પરિણામને પગલે વધારીને 12,700 કર્યો છે.

ફાઇનાન્શિયલ ક્ષેત્રના નબળા રિઝલ્ટને કારણે ચોથા ક્વાર્ટરની અર્નિંગ સીઝનનો નબળો પ્રારંભ થયો હતો. જોકે એવું માનવામાં આવે છે કે આ મુદ્દા એક સમયના હતા અને 2019-’20ના નાણાકીય વર્ષના બીજા છ મહિનાથી વૃદ્ધિને વેગ મળશે. આની સાથે 2019-’20ના નાણાકીય વર્ષ માટે આઉટલૂકમાં સુધારો થયો છે અને અમે 2019-’20 અને 2020-’21ના નાણાકીય વર્ષ માટે પોઝિટિવ અર્નિંગ ગ્રોથના અંદાજને જાળવી રાખીએ છીએ.

સ્થિર અને પ્રગતિશીલ આઉટલૂકને કારણે અમે બજારના પીઇ વેલ્યુએશનને 17 ગણાથી વધારીને 17.5 ગણું કરીએ છીએ. FY20 અને FY21 માટે નિફ્ટીની ઇપીએસ
અનુક્રમે 17.5 ટકા અને 15 ટકા વૃદ્ધિ સાથે ₹616 અને ₹708 રહેવાનો અમારો અંદાજ છે.

સરકારના આર્થિક વૃદ્ધિલક્ષી એજન્ડાને કારણે ફાઇનાન્શિયલ, ઇન્ડસ્ટ્રિયલ, ઇન્ફ્રાસ્ટ્રક્ચર અને સિમેન્ટ જેવાં ક્ષેત્રો સારો દેખાવ કરશે. આગામી બજેટ અંગે ઊંચી અપેક્ષા છે.

આગામી બજેટમાં સરકારનો મુખ્ય એજન્ડા રોજગારી સર્જન, સરકારી ખર્ચ, ઇન્ફ્રાસ્ટ્રક્ચર, મેન્યુફેક્ચરિંગ, નિકાસ અને ટેક્સમાં ઘટાડો હશે. બીજી તરફ ભારતીય રિઝર્વ બેન્ક (આરબીઆઇ) નીચા ધિરાણખર્ચ સાથે લિક્વિડિટીની ઉપલબ્ધતામાં વધારો કરીને આર્થિક સ્થિતિમાં સુધારો કરવા માટે ધ્યાન કેન્દ્રિત કરશે.

ઊંચો વિદેશી નાણાપ્રવાહ બજારને ઊંચા સ્તરે લઈ જશે. અમે નાના રોકાણકારોને ઇક્વિટીમાં રોકાણ વધારવા તથા મિડ-કેપ અને સ્મોલ-કેપમાં વધુ રોકાણ કરવાની સલાહ આપીએ છીએ. રોકાણકારો તેમની જોખમ લેવાની ક્ષમતાને આધારે મિડ-કેપ અને સ્મોલ-કેપ શેરોમાં 20થી 40 ટકા રોકાણ કરવું જોઈએ.

લાંબા ગાળાના વેલ્યુએશન કરતાં ઊંચા ભાવને કારણે લાર્જ-કેપ શેરો ઊતરતો દેખાવ કરી શકે છે. લાર્જ-કેપમાં રોકાણ કરી શકાય તેવા સેગમેન્ટમાં ખાનગી બેન્ક, રુરલ બેન્કિંગ, બ્રાન્ડેડ એનબીએફસી, કન્ઝ્યુમર ડ્યુરેબલ્સ, રિટેલ, એવિયેશન અને કેમિકલ્સનો સમાવેશ થાય છે.

<b>ડિસ્ક્લેમર :</b>વિવિધ બ્રોકરેજ , વિશ્લેષકો અને ફંડ મેનેજરો દ્વારા આ પાના પર દર્શાવાયેલા વિચારો તેમના પોતાના છે. વાચકોએ આ ભલામણોનો અમલ કરતાં પહેલાં વ્યાવસાયિક સલાહકારોની સલાહ જરૂરી છે. ઈટી અહીં દર્શાવેલી પસંદગી માટે જવાબદાર નથી. www.economictimes.com પર ઈટીના સિદ્ધાંતોની આચારસંહિતા ચકાસવા વિનંતી છે.

from Page Array – I Am Gujarat http://bit.ly/2Xf5zNB